دوو ساعەتی هەڵبڕاو

کەسێک فێری زەردەگەڵامان دەکا
فێری پەپوولەی هەناسەسەردیمان
کەسێ پایزمان دەخاتەوە یاد
تاسەی ئێوارە عەتران
کەسێک
بە هەنگاوی شارەکەمان کۆچ دەکا
کەسێک
پڕ بە ئاسۆی مەستیمان
لێمان بزر دەبێ و لە ناکاو
من و تۆ
دوو باوەڕی هەڵفڕیو
دوو وشەی تکاو
باوەش دەکەینەوە
باران
وڵاتێکە بۆ تەنیایی
باران ژنێکی رەنگ و پیاسەیە
باران عاشقێکی گەڕایەوە لە گەروودا
لە من و تۆدا
کاتێک
وەنەوشە و بێدەنگیمان
تێکدەهاڵێن و هەڵم دەکەن
هۆدەیەکمان دەمێنێ بۆ پێکەنین
چرایەک بۆ سروە
و
شێعرێک بۆ گریان
تەڕ دەبین و وەک دوو خەونی جۆبار
دوو ساعەتی هەڵبڕاو
دوو کاسێتی یاد
دوو سیگاری نوقم و ئازاری فریشتە دوورەکان
بە سووکی هەڵدەوەرین
دەروانین
کەسێک فێری چاوەروانیمان دەکا
فێری پەنجە تەزیوەکانمان
فێری ڕوومەتی زستانیمان دەکا
خۆیەتی و
سینەیەک لە سکڵی چاو
لە ئیستکانێک ویسکی
لە مۆسیقایەکی دوور
دادەنیشین و دەست لە گەرنی باران دەوەرێنین
دادەنیشین و بێدەنگ لە سەمای کات
لە ئاوێنەی سەفەر
لە باڵای سروە و هەوری گەڕاوە
بە سەر یەکدا
دەبارین و پێ ناگرین..

ع. هوونەر
مەهاباد 
بەهاری 2018